الرئيسية / App / مجدي عبد الغني: التربيطات تحكم انتخابات الأهلي..السيديهات معاهم ويقولك ممنوع.. اتهمونى بالسرقة فى اتحاد الكرة عشان يفطسونى.. الأحمر مخدش الدوري 4 سنين بعد ما احترفت.. والخطيب خذل أبناء جيله

مجدي عبد الغني: التربيطات تحكم انتخابات الأهلي..السيديهات معاهم ويقولك ممنوع.. اتهمونى بالسرقة فى اتحاد الكرة عشان يفطسونى.. الأحمر مخدش الدوري 4 سنين بعد ما احترفت.. والخطيب خذل أبناء جيله

مجدي عبد الغني ومحمد عراقي مجدي عبد الغني ومحمد عراقي

الخطيب خذل جيله

لو السما أطبقت على الأرض مش هترشح تانى

اتهمونى بالسرقة فى اتحاد الكرة عشان يفطسونى وميعرفوش أن مجدى عبد الغنى يشترى الاتحاد ويبيعه

عُمر محد قالى تعالى اشتغل فى الأهلى

النفسنة خلصت على مجلس هانى أبور ريدة

محمد صلاح برىء من تهمة إشعال الفتنة

صالح سليم رفض طلبى بالاعتزال فى الأهلى وسمحو لمجدى طلبة الزملكاوى أنه يختم مسيرته معاهم

أنور سلامة بطلنى أهلاوي أنا وطاهر أبو زيد وربيع ياسين

الأهلى بعد ما احترفت مخدش الدورى 4 سنوات

كنت بحجز تذاكر الطيران على حسابى لأن الاتحاد مكنش حلته حاجة

جبت خالد عيد معايا البرتغال وبعد ما وصل قالى أمى وحشتنى ورجع

الزمالك سجل كهربا فى الوقت الصحيح والعقوبات فى انتظاره

الناس قرت فاتحة كوبر.. وأجيرى ماخدش فرصته

الأهلى بيقدم أحلى أهلاوي مع فايلر والتدخلات مشكلة الزمالك

 

لاعب فذ خاض مشوارا كبيرا مع النادى الأهلى ومنتخبنا الوطنى، وحقق العديد من النجاحات ليكتب اسمه بحروف من نور فى سجل نجوم الكرة المصرية على مدار تاريخها.

مجدى عبد الغنى اللاعب والمسئول الإدارى رفيع المستوى، والذى تولى عضوية اتحاد الكرة قبل أن يتقدم باستقالته على خلفية فشل المنتخب الوطنى فى نهائيات كأس الأمم الأفريقية الأخيرة، والمشرف على جمعية اللاعبين المحترفين، فتح قلبه وتحدث عن الكثير من القضايا والملفات الشائكة بالإضافة لإلقاء الضوء على مشواره الكروى الحافل بالإنجازات فى الحوار التالى:

 

كيف بدأت مشوارك مع كرة القدم؟
 

بدأت من روض الفرج ورحت بعد كدا اختبارات النادى الأهلى ونجحت فيها ثم تدرجت فى فرق الناشئين وكان عمرى فى وقتها 14 عاماً.

 

من قام بتصعيدك للفريق الأول بالأهلى؟
 

هيديكوتى بعد أن تألقت مع فريق 19 سنة.

 

من كان يتواجد فى فريق الأهلى الأول فى وقتها؟
 

تم تصعيدى فى موسم 76 وكان الأهلى بيغير جلده وكان الجيل الجديد هو الخطيب ومصطفى عبده وعبد العزيز عبد الشافى ومصطفى يونس وحسن حمدى وطاهر الشيخ ومختار مختار.

 

من كان أقرب لاعب لك بعد تصعيدك؟

طاهر الشيخ فهو كان صاحبى من وأنا عيل صغير وهو راجل وعمره ما كان منفسن ولا حاقد لأنه ابن ناس شبعان فى وقت مكنش ولاد الذوات بيلعبوا أهلاوي، وأنا كنت أنتمى لنفس الطبقة بتاعته عشان كدا كنت أنا وهو صحاب.

 

وهل هناك ربط بينك وبين جيلك حالياً؟
 

من ناحيتى بحاول أساعد كل جيلى وأثناء تواجدى فى اتحاد الكرة كنت صاحب قرار تواجد أكثر من واحد منهم للعمل فى المنتخبات، وعلى رأسهم مصطفى يونس وإسماعيل يوسف.

 

وماذا عن باقى أبناء جيلك؟

الخطيب مثلا وهو أكبر منى المفروض أنه هو اللى يلم الجيل، ولكن هذا لم يحدث وخذل جيله، فأنا الوحيد اللاعب الذى حقق تاريخا فى الأهلى، ولكنى لم أحصل على فرصتى فى بيتى ومش عارف السبب وعمري ما تعرض عليا العمل فى الأهلى.

 

عانيت من هذا التجاهل؟

بالطبع فبعد مثلاً انتهاء رحلتى الاحترافية فى البرتغال تحدث معى البعض عن ضرورة التحدث مع بعض الأشخاص لختام مسيرتى فى الأهلى، ولكنى رفضت وفضلت الانتقال للمريخ ثم المقاولون العرب واعتزلت بعدها.

 

ألم تحاول الاعتزال فى الأهلى؟
 

حاولت بالطبع ولكنى كنت مُطالبا بالتحايل على بعض الأشخاص وهذا الأمر لا أقبله، بل وقدمت طلبا بذلك ولكن إدارة الأهلى برئاسة صالح سليم فى وقتها رفضت الطلب ولم أتلق أى رد.

 

كيف خاض مجدى عبد الغنى تجربته الاحترافية؟

عن طريق مراسل فرانس فوتبول بعد حصولى على لقب رابع أفضل لاعب أفريقى، وكان الثلاثة الأوائل محترفين وأنا كنت بلعب فى الأهلى وقتها، أنور سلامة كان المدير الفنى فى وقتها وكان عنده اقتناع أن اللى عنده 28 سنة يبقى قرب يبطل وعشان كدا أتسهلت مسألة احترافى، ومن بعد رحيلى الأهلى قعد 4 سنوات مياخدش الدورى، وبردوا بطل ناس تانية غيرى زى طاهر أبو زيد ومحمود صالح وربيع ياسين.

 

ما هى كواليس استغناء الأهلى عن عدد من نجومه فيما يسمى مذبحة النجوم عام 92؟
 

قعدوا مع النجوم وقاللهم بطلوا ودول كانوا جيلى وكنت لسه راجع من الاحتراف وعشان كدا فقدت الأمل فى ختام مسيرتى فى الأهلى.

 

ما هى كواليس مشاركتك فى كأس العالم 1990؟
 

كنت المحترف الوحيد فى وقتها، وكنت بحجز تذاكر الطيران على حسابى، لأن اتحاد الكرة هنا مكنش حيلته حاجة، وأنا كان معايا فلوس ومكنش فارق معايا، ومكنتش كمان باخد مكافأة المباريات، وبعد كدا عرفوا أن فى أكثر من لاعب محترف مثل عظيمة وطارق سليمان ومجدى طلبة اللى لعب طول عمره فى الزمالك والأهلى أداله الفرصة يبطل فى الأهلى لأ وكمان بيدرب فى الأهلى، وتم استدعاؤهم للمشاركة فى كأس العالم.

 

كيف كنت تتعامل مع اللاعبين وأنت المحترف الوحيد؟

الجوهرى كان بيضرب المثل بيا وكان بيقول للاعبين لما هتبقوا كويسين هتبقوا زى مجدى.

 

ولكن لماذا تغير الأمر الآن فهناك مثلاً مشاكل بين اتحاد الكرة ومحمد صلاح؟

خلاص الدنيا أتغيرت إحنا منتخبنا عمره مقعد فى فندق 5 نجوم وكان الجوهرى بيرفض ويقول لو عملت كدا اللاعيبه هتكون مرفهة بس دلوقتى مبقاش ينفع لأنهم بيروحوا مع أنديتهم أفضل الفنادق.

 

قمت بترشيح لاعب للعب فى البرتغال معك؟

رشحت خالد عيد وجه بالفعل لعب أسبوع معانا وبعد كدا قالى أمى وحشتنى وعايز أروح.

 

ما هى أبرز المواقف الصعبة فى مسيرتك الكروية؟

كنت بلعب مع منتخب مصر مرة فى مدغشقر والجماهير كسرت الأتوبيس علينا وحدفوا طوب وكنا قريبين جداً من الموت لولا ستر ربنا، ومكنش فى حاجة اسمها طيرن خاص وكنا بنام على الأرض فى المطار بعد ما نوصل.

 

فكرت فى خوض مجال التدريب؟

لم أفكر فى مجال التدريب مطلقا، ولكنى سلكت العمل الإدارى وأثناء احترافى شاهدت عمل جمعيات اللاعبين المحترفين، وقمنا بتدشينها فى مصر برفقة بعض النجوم.

 

حدثنا عن تجربتك فى انتخابات الأهلى؟

انتخابات الأهلى تختلف عن أى مكان آخر.. أعضاء الأهلى دلوقتى مش هما اللى لعبت أيامهم والنادى الأهلى اتضح أن فى تربيطات وشركات تتحكم فى النتائج، وهناك مجموعة وخدا السيديهات ومخبياها عليك يعنى السيديهات معاهم وأنت تروح تقلهم عيزها يقولولك ممنوع.

 

من الممكن أن تفكر أن تخوض انتخابات الأهلى مُجدداً؟
 

لا مش هنزل تانى أبداً انتخابات الأهلى لو السماء أطبقت على الأرض.

 

وماذا عن انتخابات اتحاد الكرة؟
 

اه هنزل إن شاء الله.

 

ترى أن اتحاد الكرة السابق اتظلم؟
 

اتظلم وظلم نفسه بسبب توتر العلاقة بين الأعضاء وكانت العلاقة وحشة، مثلاً شوبير جه استقطب 4 أعضاء وأنا علاقتى بشوبير كويسة بس مكنتش مستقطب لأن مينفعش يبقى الاتحاد فرقتين.

 

هل كان لمحمد صلاح دور فى أزمات اتحاد الكرة؟

لا ليس هو.. صلاح طلب طلبات مشروعة، مصر مجابتش لاعب زى صلاح وإحنا مش عارفين نتعامل معاه ولا هو عارف يتعامل معانا، هو كان طالب أنه مينزلش المطار يتبهدل ويتصور مع كل الناس وطلب تأمين لكل اللاعبين وكل هذا أتعمل بالفعل بعد كدا لأن ده الصح.

 

خرج كلام وإشاعات عن سرقتك ملابس قبل السفر مع المنتخب؟

أى كلام كانوا عايزين يفطسوا مجدى عبد الغنى والمفاجأة أن الكلام ده طالع من جوا الاتحاد لأن ولاد الكار الواحد بيكرهوا بعض.. وهذا الأمر ضايقنى لأنى أشترى الاتحاد وأبيعه اللى خته كان من حقى كرئيس بعثة.

 

لازلت مُصر أن عقد كهربا مع الزمالك صحيح؟
 

نعم كهربا تم قيده بشكل صحيح، كونه أنه ياخد بطاقة من برا ده أمر لا يخصنى واللائحة بتقول إن اللاعب لما ياخد بطاقة يبقى فسخ العقد من طرف واحد، وهذا الأمر يستوجب عقوبة على الطرف الذى قام بالفسخ.

 

وهل بالفعل تسجيل عقد كهربا لم يكن فى الوقت الصحيح؟
 

كلام غير صحيح.. كهربا تم قيده فى الوقت الصحيح وإيه مصلحتى إنى أسجله فى وقت غير قانونى والسؤال هنا كهربا لعب ليه وهو أتسجل فى وقت غير قانونى، هنا فى مصر الناس مشيا زى القطر محدش بيفكر.

 

ترى أن رحيل كوبر كان خطأ؟
 

الناس قرت فتحته وهو كان محترم جداً أخلاقيا وفنياً.

 

وماذا عن أجيرى؟
 

أجيرى لم يحصل على الفرصة وقابله سوء توفيق، ولكنه لم يحصل على فرصته كاملة خاصة وأن البطولة لم نكن مستعدين لها فنياً.

 

وماذا عن اختيار حسام البدرى؟
 

البدرى مدرب كبير ويستحق هذه الفرصة والمكانة.

 

ما رأيك فى فايلر؟
 

الأهلى يقدم أحلى مستوى مع فايلر، ولكنه يحتاج مراجعة أدائه فى البطولة الأفريقية.

 

ما هى أزمة الزمالك؟
 

التدخل فى الكرة هو سر أزمات الزمالك، لابد أن يتم منح كافة الخيارات للمدير الفنى والحساب يكون فى نهاية الموسم.

 

ما رأيك فى الفار؟
 

سيحل العديد من المشاكل فى الدورى.

 

من اللاعبين الذى كنت تحب اللعب معه؟
 

طاهر أبو زيد ومحمود الخطيب وشوقى غريب وعلاء ميهوب.

 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *